Бұл туралы бейсенбі күні батыстың бұқаралық ақпарат құралдары хабарлады.
«Апаттың ауқымын, оператордың мәртебесі мен жауапкершілігін ескере отырып, айыпталушыны 15 жылға соттауды талап етеміз», — деді сот отырысында прокуратура өкілі.
71 жастағы Ким Хан Сикке қылмыстық салғырттық танытты деген айып тағылып отыр. Өйткені, апатқа ұшыраған паром үнемі артық адам мінгізіп келген.
«Севол» Оңтүстік Кореяның оңтүстік-батыс жағалауында сәуірдің 16-сында апатқа ұшыраған болатын. Апат кезінде кеме бортында 476 адам болған. Жолаушылардың басым бөлігі жағалаудағы курортты қалаға бет алған оқушылар еді.
Салдарынан 300-ден астам адам мерт болды.
Паромның капитаны мен команда мүшелерінің басым бөлігі құтқару қайықтарына мініп, апат болған жерден қашып кеткен.