«I-SEED: Инновация — әлеуметтік кәсіпкерлік және білім» жобасы аясында жас кәсіпкер мектептері ашылды.
«Бұл екі мектепті ашудағы басты мақсат — Алматы жастарын кәсіпкерлікпен айналысуға ынталандыру. Оларды оқыту және жан-жақты қолдау көрсету. Сол үшін біз Британ Кеңесі және «Шеврон» компаниясымен бірлесе отырып, тұңғыш рет осы екі мектепті ашып отырмыз», — деді өз сөзінде Алматы қ. Кәсіпкерлер палатасының жастар саясаты бөлімінің бастығы Айгүл Халықова.
Сонымен қатар, ол осы жоба аясында үздік бизнес-жоспар ұсынған жастарға арнайы гранттар бөлінетіндігін айтты.
«Осы екі оқу орны базасында мамыр, қыркүйек, қазан және қараша айларында бір мезетте 20 адамнан оқытылатын болады. Оқу мерзімі — 3 апта. Сабақтар аптасына үш рет жүргізіледі. Әр сабақтың ұзақтығы -2 сағат. Осы жоба аясында барлығы 8 топ бойыша 160 адамды қамтуды көздеп отырмыз. Оқу аяқталған соң әрбір топ бойынша үздік бизнес-жоспарға байқау жарияланады. Әрбір жеңімпазға 150 мың теңге көлемінде грант табыс етіледі», — А. Халықова.
Айта кетелік, жас кәсіпкер мектебінде оқу тегін. Онда оқуға ниет білдірушілер Алматы қ. Кәсіпкерлер палатасына жүгіне алады. Онда арнайы сауалнама толтырады. Мамандар оқушыларды сол арқылы іріктеп алады. Басты талап — жастардың жасы 29-дан аспауы керек. Сонымен қатар олардың өз ісін ашуға деген ынта-ықыласы болуы қажет. Яғни, оқуға әлі кәсіпкерлікпен айналыспаған, бірақ өз ісін ашқысы келетін кез келген жас өтініш бере алады.
