Бұл туралы Caravan.kz медиа-порталы хабарлайды. Фейсбукте Айгүл Орынбек жүктеген видеода Дін мәселелерін зерттеу орталығының басшысы Нұржан Тұрсынбайдың соттың шешімімен қызметіне қайтадан келгенін байқауға болады.
Әйтседе, оның өз орнына қайта келуіне діни орталықтың барлық ұжым мүшелері бірауыздан қарсы болып отыр. Мына видеода орталық қызметкерлері наразылықтарын білдіріп, қайтып келген басшыға қарсы екендіктерін айту үшін жиналған.
Мысалы, олардың бірі дау шыққан кезде арнайы құрылған комиссия мүшелеріне жеке жеке түсінік бергендерін және бұл адаммен бірге жұмыс істеуге қарсы екендіктерін тағы да қайталайтынын айтуда.
Екінші азамат болса, «терроризм, экстремизммен күрес мәселесі күн тәртібінде тұрғанда бұл кісімен қайтадан соттасып, ырың-жырыңға түсетін жағдай жоқ. Бұл кісі 2016 жылдан келгелі бері ұжымда ынтымақ жоқ, екіге бөліну болып кетті. Енді сол тағы қайталанады»,- дейді.
Ұжым мүшелері соңына наразылықтарын білдіріп, орындарынан тұрып кетті. Қазіргі кезде олар барлық құзырлы орындарға арыз жазып жатқан көрінеді.
Еске салсақ, маусым айында ғаламторда әлдебір адамның жас келіншекпен анайы түрде жыныстық қатынасқа түсіп жатқан видеосы тарады. Ондағы ер адамның түр келбеті ОҚО Дін мәселелерін зерттеу орталығының бастығы Нұржан Тұрсынбайға ұқсайтын. Әлеуметтік желіге кең тарап, шу шығып кеткен соң Нұржан Тұрсынбай мырза қызметінен кеткен болатын және де бейнекөріністегі жыныстық қатынасқа түскен адамның өзі екенін жоққа шығарған. Ал даулы видеоны фейсбукке дінтанушы Нұржан Тұрсынбайдың атын жамылған белгісіз адам жүктеген.
Аймақта орын алған келеңсіз оқиғадан соң ОҚО дін істері бойынша басқарма басшысы Батырбек Жалмұрзаев та орнын өз еркімен босатқан еді.
ОҚО Діни зерттеу орталығының былығы жалғасуда! Дін істер министірі Н. Ермекбаев мырзаның назарына! "Бұндай басшы керек емес"- деген ұжым қарсы шығып барлық құзырлы органдарға арыз жазуда!
Posted by Айгүл Орынбек on Tuesday, November 28, 2017