Қазақстандық кәсіпқой Данияр Елеусіновтің (5-0, 3 КО) 2019 жылы жұдырықтасатын алғашқы қарсыласы белгілі болды, — деп хабарлайды Vesti.kz.
BoxRec.com сайтында жарияланған ақапарат бойынша, 15 наурызда қазақстандық боксшы Филадельфиядағы Liacouras Center аренасында мексикалық Карлос Хименеспен жұдырықтасады. Жекпе-жек сегіз раундқа есептелген.
29 жастағы Хименес үшін бұл кәспқойдағы 25-ші жекпе-жегі болады. Мексикалық 14 жеңіске жеткен (8 нокаут), тоғыз рет жеңілген (бір нокаут) және бір қарсыласымен тең түскен. Соңғы рет ол 2018 жылы 13 қазанда жұдырықтасып, канадалық Матье Жерменнен (16-0-1, 8 КО) жеңілген еді.
Айта кетейік, Елеусінов жұдырықтасатын бокс кешінде қазақстандық Геннадий Головкиннің бұрынғы қарсыласы америкалық Габриэль Росадо және Олимпиада чемпионы болған ирландиялық боксшы қыз Кэти Тэйлордің де жекпе-жектері өтеді.
Еске салайық, соңғы рет Елеусінов былтыр қазанда Монакода жұдырықтасқан. Қазақстандық үшінші раундта никарагуалық Маркос Мохиконы техникалық нокаутпен жеңді. Кәсіпқой рингте 27 жастағы Елеусіновтің есебінде бес жекпе-жек бар, боксшы барлығын жеңген. Оның үшеуін нокаутпен.
