Павлодарда өрттен зардап шеккен әйелдің балалары анасын соңғы уақытта бірге тұрған адам әдейі өртегенін айтады, деп хабарлайды Stan.kz ақпарат агенттігі Tengrinews.kz сайтына сілтеме жасап.
22 қарашаға қараған түні 4 қабатты үйдегі пәтерлердің бірінде өрт болды. Өрт сөндірушілер оқиғағаорнына жетіп, бес адамды, оның ішінде үш баланы құтқарды. Өрт сөндірушілер жеткенге дейін 36 жастағы ер адам мен 27 жастағы әйел ауруханаға ауыр жағдайда жеткізілді. Олар III дәрежелі күйік алған.
Құтқарылғандардың арасында зардап шеккен әйелдің мектеп жасындағы екі ұлы болды.
Балалардың айтуынша, пәтердегі өртті анасымен бірге тұратын адам ұйымдастырған.
"Ер адам әйелді бірнеше рет ұрып-соққан. 22 қарашада үйіне бензин бөтелкесін әкеліп, оны әйелдің үстіне құйып, өртеген. Шамасы, ұшқыны абайсызда өзіне де тиген. Екеуі де өртенді. Балалар сол кезде үйде болған. Анасы өзі өртеніп жатса да, бір баланы кіреберіске лақтырып үлгерді. Екінші баланы сол үйде тұратын әйел шығарып алды", – деді "Павлодар қаласының Vita іздеушілері" қоғамдық бірлестігінің басшысы Екатерина Кудрявцева.
Қазір екі бала әжесінің қолында және анасының оралуын күтуде. Жақында ол жан сақтау бөлімінен палатаға ауыстырылды. Аймақтық денсаулық сақтау басқармасының мәліметі бойынша, әйелдің денесінің 30 %-ы күйіп қалды. Ал өртеген ер адам денесінің 63 %-ын күйдірді және әлі де жан сақтау бөлімінде.
Еріктілер 24 қарашада өртенген пәтерге барған.
"Екі бөлмеден басқа, жалпы дәліз және көршінің есігі өртенді", – деп атап өтті Кудрявцева.
Полицейлер бұл оқиғаны кісі өлтіруге оқталу ретінде тергеуде
"22 қарашада сағат 23:02-де Павлодардағы Ломов көшесі бойында екі тұрғын зардап шеккен оқиға бойынша полиция тергеу жүргізуде. Тергеу 24-баптың 3-бөлігі "Қасақана ниетпен жасалған, қылмыс жасауға тікелей бағытталған әрекеттер (әрекетсіздік) қылмысқа жасалған әрекет деп танылады” және ҚК-нің 99-бабы 2-бөлігінің 6-тармағы "Басқа адамдардың өміріне қауіпті тәсілмен жасалған кісі өлтіру" бойынша қарастырылады. ҚР ҚІЖК — нің 201-бабына сәйкес, сотқа дейінгі тергеп-тексеру деректері жария етілмейді", – деп хабарлады Павлодар облысы полиция департаментінің баспасөз қызметі.
Басқа адамдардың өміріне қауіп төндіретін тәсілмен жасалған кісі өлтіруге жасалған қастандық үшін мүлкі тәркіленіп немесе 15 жылдан 20 жылға дейін бас бостандығынан айырылады, тіпті өмір бойы бас бостандығынан айырылуы мүмкін.