Қазақстан АҚШ кәсіпкерлерін республика экономикасының нақты секторына инвестиция салуға шақырады

ҚР индустрия және сауда министрі Әділбек Жақсыбеков АҚШ-тық кәсіпкерлерді "республика экономикасының тек шикізат саласымен ғана шектелмей, нақты секторға да инвестиция салуға" шақырды. Бүгін, 28-мамырда АҚШ Конгрессінің сенаторы Конрад Бернспен бірге елімізге келген саудагерлер миссиясының қатысуымен Астанада өткен бизнес-форумда ҚР индустрия және сауда министрі осындай мәлімдеме жасады.

Ә.Жақсыбековтың атап көрсеткеніндей, қазір Қазақстанға қаржылық инвестициядан гөрі «озық менеджмент пен озық технологиялар қажет».

Индустрия және сауда министрінің пайымдауынша, Қазақстан дүниежүзіндегі ең ірі екі держава — Ресей және Қытаймен шекараласатындықтан, сондай-ақ, «бұл елдермен арадағы сауда-саттыққа ешбір шектеу қойылмағандықтан», республика экономикасының нақты секторына бағытталған инвестициялар «400-500 млн. адамды қамтитын ауқымды рынокты қамтамасыз ете алады».
Ә.Жақсыбеков АҚШ кәсіпкерлерін инвестицияны Каспий қайраңының инфрақұрылымын дамыту мақсатына жұмсауға шақырды.