Атап айтсақ, А.Вольский «Мемлекеттің әлеуметтік-экономикалық әлеуетін арттырудағы ірі бизнестің ролі» тақырыбындағы дөңгелек үстелге қатысуға ниет білдірді. Бұл шараны Ресейдің өнеркәсіпшілер мен кәсіпкерлер Одағы, Қазақстан жұмыс берушілер конфедерациясы мен ЕурАзЭҚ іскерлік кеңесі бірлесе ұйымдастырады.
Кездесу барысында тараптар екі ел арасындағы экономикалық байланысты дамыту, екі ел кәсіпкерлері мен өнеркәсіпшілері арасындағы ынтымақтастықты пәрмендендірудің нақты жолдары туралы талқылады. Онда екі мемлекеттің экономикалық ынтымақтастығы қарқынды дамып келе жатқаны айтылды. 2003-жылы екі ел арасындағы тауар айналымының 30 процентке артып, жалпы көлемі 5,2 млрд. долларға жетуі оған нақты дәлел болмақ.
Сондай-ақ, Қ.Көшербаев сұхбаттасына Қазақстан президентінің халыққа арнаған жолдауының мән-мазмұны туралы, стратегиялық даму бағдарламаларының жүзеге асырылу барысы туралы әңгімелеп берді.
Ресейдің өнеркәсіпшілер мен кәсіпкерлер Одағы 1991-жылдың желтоқсан айында құрылған. Оған түрлі экономикалық ұйымдардың 328 мың өкілі біріккен. Одаққа біріккен кәсіпорындар Ресей Федерациясының Жалпы Ішкі Өнімінің 60 проценттен астамын өндіреді. Одақ бизнес пен билік арасында конструктивтік қарым-қатынасты қамтамасыз етуді, сондай-ақ, Ресейдің іскерлік қоғамдастығының мүддесін қорғауды мұрат тұтады.