Қарағандыдағы ірі базарлардың бірінде өрт шықты

22-маусым күні 13 сағат 50 минутта Қарағандыдағы ірі базарлардың біріне саналатын "Алтын Арба" базарында өрт шықты. Осындағы азық-түлік өнімдері мен кір жуғыш құралдар сататын екі контейнер бір уақытта от құшағына оранған. Тұтастай алғанда 150 шаршы метр аумақ өртенді,- деп хабарлайды KZ-today тілшісі.

Мемлекеттік өртке қарсы күрес қызметінің ақпаратына сәйкес, бір жарым сағатқа созылған өрт сөндіру жұмыстарына жеті өрт сөндірушілер бригадасы жұмылдырылды. Базар директорының орынбасары Александр Холиннің айтуынша, дүйсенбі — базарда демалыс күні болуының арқасында ғана ешкім зардап шеккен жоқ. Базар қызметкерлері өрт қасақана жіберілді деген пікірде.

Өрт салдарынан екі контейнердегі тауарлар түгелімен жанып кетті. Тілсіз жау мен түтіннен тауар қоймалары да қатты зардап шеккен. Қазір өрттің шығу себептері дәйектеліп, шығын көлемі есептелуде.