Алматыдағы фармакологиялық компанияның қоймасынан Биттнер бальзамының 50 мың бөтелкесі тәркіленді

Алматы қалалық экономикалық және жемқорлық қылмыстармен күрес департаментінің қызметкерлері жедел-іздестіру шараларының нәтижесінде Алматыдағы "Интерфарма-К" ААҚ-ның қоймаларында акцизді тауарға жататын, күшті спиртті ішімдіктер санатындағы Биттнер бальзамының ҚР акциздік алым маркаларынсыз сақталып, сатылып жатқанын анықтады. Бұл туралы KZ-today тілшісіне Алматы қалалық экономикалық және жемқорлық қылмыстармен күрес департаментінің баспасөз қызметінен хабарлады.

Фирма қоймаларынан жалпы құны 23 636 096 теңгеге бағаланған 51 008 бөтелке бальзам табылды.

Әшкереленген әкімшілік құқық бұзушылық дерегіне сәйкес «Интерфарма-К» ААҚ-на 137 850 теңгенің айыппұлы салынып, табылған акциздік маркасыз бальзамдар партиясын мемлекеттік кіріс есебінен тәркілеп алынды.