Абай қаласындағы бір мектеп карантинге жабылды

Қарағанды облысындағы Абай қаласында вирусты гепатит дертінің етек алуына байланысты №14 мектеп карантинге жабылды. Жұқпалы індеттің таралуына қарсы төтенше комиссия өз бұйрығымен мектепті жапқан,- деп хабарлайды KZ-today тілшісі.

Алдын-ала карантин мерзімі екі апта деп белгіленді.

Бұдан бұрын да хабарлағанымыздай, Қарағанды облысының Абай қаласында вирусты гепатиттің «А» түрі етек алған. Індеттің таралуына су құбыры жүйелерінің ауыр жағдайы түрткі болды деп саналуда.
ҚР төтенше жағдайлар жөніндегі агенттігінің 13-қыркүйек күнгі кешкі мәліметі бойынша Абай қалалық ауруханасының жұқпалы ауралар бөлімінде «вирусты гепатит» деген диагнозбен 115 адам жатыр.