Мемлекеттік мекемелерді қайта құру ондағы мемлекеттік қызметкерлердің санын қысқартуға апарып соқпайды - үкімет басшысы

Мемлекеттік басқару деңгейлері арасындағы өкілеттікті ажырату және өткен жұмада президент Нұрсұлтан Назарбаев айқындаған міндеттер аясында бірқатар мемлекеттік органдарды қайта ұйымдастыру мәселесі үкімет басшысы Даниал Ахметовтың төрағалымен өткен кеңесте талқыланды. Бұл туралы KZ-today тілшісіне үкімет басшысының баспасөз қызметінен хабарлады.

Кеңес барысында үкімет басшысы атқарушы биліктің орталық органдарын одан әрі реформалау үшін қысқа мерзімде схема әзірлеумен айналысатын жұмыс тобын құру туралы тапсырма берді.

Осыған байланысты Даниал Ахметов мемлекеттік қызметшілердің қысқартудан қауіптенуінің қажеті жоқ екенін, олардың еліміздің мүддесі үшін өз орындарында тиімді жұмыс атқара беруі қажеттігін ерекше атап өтті.
«Үкіметтегі өзгерістерден еліміз де және онда тұратын әрбір азамат та ұтады», — деді үкімет басшысы.