Абай қаласында балаларға гепатитке қарсы вакцина егу шарасы басталды

Бүгін, 11-қазанда Қарағанды облысының Абай қаласына балаларға гепатиттің "А" түріне қарсы егуге арналған "Хаврикс" препаратының алғашқы партиясы жеткізілді. Бұл туралы KZ-today тілшісіне Мемлекеттік санэпидқадағалау қызметінің облыстық департаментінен хабарлады.

Бұдан бұрын да хабарлағанымыздай, вакцина сатып алуға арналған 9,5 млн. теңге қаржы облыстық бюджеттен бөлінген.

Жұқпалы аурулармен күресуші дәрігерлердің айтуынша, вакцина барлық сатылы сараптамалар мен тексерулерден өткізілді. Абай қаласында 3-7 жас аралығындағы 3,5 мың балаға вакцина егіледі. Әрбір бала тиянақты дәрігерлік байқаудан өтіп, олардың арасынан вирусты гепатитпен бұрындары ауырмаған, яғни, иммунитет қалыптаспаған балаларға ғана вакцина егіледі.
Вакцина егу шарасы 15-қазаға дейін жалғасады.
Бүгінгі жағдаймен Абайда вирусты гепатитпен ауырғандар саны 500 адамнан асты. Күн сайын жаңадан ауырған 8-10 науқас айқындалуда.