"Қазақстан-КамАЗ" консорциумы мен "Астана-Финанс" АҚ Көкшетауда автобус шығаратын бірлескен кәсіпорын құруға келіскенін мәлімдеді

28-қазанда «КамАЗ» АҚ-ның бас директоры С.Когогин, «Астана-Финанс» АҚ-ның басқармалары төрағасы Қ.Исламов пен «Орталық Азиялық жылу-энергетикалық компаниясы» ЖАҚ-ның директорлары кеңесінің мүшесі Е.Әмірханов Көкшетаудағы «Көкше» АҚ-ның өндірістік алаңдары базасында автобус шығаратын бірлескен кәсіпорын құру туралы ниет хаттамасына қол қойды. Мамандардың есептеуінше, жобаға жұмсалатын инвестиция ауқымы 20-30 млн. долларды құрайды.

Бастапқы кезеңде жолаушы сыйымдылығы жоғары қалалық 200 автобус пен орташа сыйымдылығы бар 1,5 мың автобус өндіру көзделіп отыр. Бұл санды жылына 3 мыңға дейін жеткізу мүмкіндігі бар. Автобустарды құрастыруда КамАЗ шассилері мен көбінесе қазақстандық кәсіпорындарда өндірілген бөлшектер қолданылады.
«КамАЗ» ААҚ, «Астана-Финанс» АҚ, «Қазақстан Инжиниринг ҰК» ААҚ, «Тыныс»АҚ-ның мамандары қамтылған жұмыс тобының маркетингтік зерттеулерінің қорытындысына қарағанда Қазақстан рыногының жыл сайынғы автобусқа деген сұранысы 4-4,5 мыңды құрайды.