Сенат "Экстремистік іс-әрекеттерге қарсы күрес туралы" заң жобасын алғашқы оқылымда мақұлдады

Заң жобасын палата отырысында таныстырған ҚР әділет министрінің орынбасары Серік Баймағамбетовтың түсініктемесіне жүгінсек, «бұл заң жобасы Қазақстан аумағында жұмыс істейтін шетелдік ұйымдардың бөлімшелерінің іс -қызметін экстремистік іс-қызметке жатқызу тәртібін айқындайды. Мұндай құқық Астана қалалық сотына берілді». «Қандайбір шетелдік ұйымды экстремистік ұйым деп тану жөнінде Астана қалалық сотына шағым түсіру құзыретіне прокуратура органдары ие»,- деді ол.

Вице-министрдің айтуынша, дүниежүзінде барлығы 500-ден астам экстремистік ұйым жұмыс істейді. «Қазақстанда мұндай тізім жоқ. Өйткені, ұйымды экстремистік ұйым деп тану жөніндегі процедуралар күні бүгінге дейін айқындалған жоқ болатын»,- деді С.Баймағамбетов.
«Экстремистік іс-әрекеттерге қарсы күрес туралы» заң жобасы екінші оқылымға әзірлеу үшін сенаттың салалық комитетіне жолданды.