Қазақстан үкімет басшысы Венгрияның "HVG" басылымының журналисімен кездесті

Бүгін, 14-ақпанда Венгрияға жасаған жұмыс сапары барысында ҚР Үкімет басшысы Даниал Ахметов Будапешт қаласында осы елдің ең ірі журналдарының бірі "HVG" басылымының журналисі Ласло Видамен кездесті. Бұл туралы KZ-today тілшісіне Орталық және Шығыс Еуропа елдеріндегі Қазақстан елшілігінен хабарлады.

Елшіліктің ақпаратына сәйкес, Д.Ахметов Венгрияға 13-ақпанда ұшып келген. Екі күндік жұмыс сапары барысында Қазақстан үкімет басшысы Орталық және Шығыс Еуропа елдерінің іскерлік өкілдерімен, сондай-ақ, Венгрия президенті Ференц Мадл мырзамен кездеседі. 14-ақпанда Д.Ахметов Люксембург үкімет басшысы Жан Клод Юнкермен жүздеседі деп жоспарланған.

Ал ертең 15-ақпанда Қазақстан үкімет басшысы Халықаралық еңбек ұйымының ХІІ аймақтық конференциясының ашылуына қатысып, аталмыш халықаралық ұйымның басшысы Хуан Сомавиямен кездеседі. Сол күні Д.Ахметов Венгрия үкімет басшысы Ференц Дюрчанмен жүздеседі.
15-ақпан күні кешке Д.Ахметов елге оралады.