БҰҰ Орталық Азия елдерінің одағын құру туралы бастаманы қолдайды

БҰҰ Орталық Азия аймағындағы мемлекеттердің ортақ рынок пен біртұтас валюта енгізуге бағытталған интеграциялық бастамаларын толық қолдайды. Бұл туралы БҰҰ Бас хатшысының саяси мәселелер жөніндегі орынбасары Киеран Прендергаст Қазақстанның Біріккен Ұлттар ұйымындағы тұрақты өкілі Ержан Қазыхановпен кездесуде атап көрсетті,- деп хабарлайды KZ-today тілшісіне ҚР СІМ-нің баспасөз қызметінен.

СІМ-нің хабарламасында атап көрсетілгеніндей, БҰҰ Қазақстан президенті Нұрсұлтан Назарбаевтың жолдауында айтылған Орталық Азия елдерінің одағын құру туралы бастаманы айрықша қызығушылықпен қабылдады. «Мемлекеттердің аймақтық келісімдерге бірігуі — олардың артықша тиімді экономикалық дамуына және ХХІ ғасырдағы жаңаша қауіп-қатерлерге қасқая қарсы тұруға септігін тигізеді»,- делінген хабарламада.

БҰҰ Бас хатшысының орынбасары Қазақстан президенті Нұрсұлтан Назарбаевтың интеграциялық процестерді пәрмендендіруге және Еуразия кеңістігіндегі тұрақтылық пен қауіпсіздікті қамтамасыз ету ісіне қосқан өлшеусіз үлесін атап өтті.
К.Преднергаст мырзаның айтуынша, БҰҰ-ның басшылығы Орталық Азия аймағының барған сайын арта түскен роліне айрықша маңыз берумен бірге бұл өңірдің халықаралық саяси және экономикалық байланыстар жүйесіне табысты интеграциялануына жан-жақты қолдау көрсететін болады.