Алматы мен Алматы облысында электр қамтамасыздығында үзілістер туындауы мүмкін

АПК ақпаратына сәйкес, бүгінде жергілікті станцияларды толыққанды іске қосқан жағдайда да күн сайынғы электр қуатының тапшылығы 2-2,5 млн. Квт/сағ немесе 80-100 МВт-ты құрап отыр. 2005-жылдың 26-наурызынан бастап Жамбыл ГРЭС-і жұмысын тоқтатуға байланысты жеткіліксіз электр қуатын еліміздің солтүстігінде немесе Қырғызстанда орналасқан электр станцияларынан сатып алу арқылы ғана қамтамасыз етуге болады,- деп хабарлайды энергетикалық компания.

«Солтүстік-оңтүстік бағытында электр қуатының транзитіне АПК-ға арнап бөлінген квота 70 МВт-қа тең. Алайда «KEGOC»АҚ компания үшін транзитке небәрі 30 МВт бөліп отыр»,- делінген хабарламада. «Қалыптасқан күрделі ахуалдан «KEGOC» ұлттық компаниясы тарапынан АПК-ға арналған транзиттік квота мөлшерін 70 МВт-қа дейін арттырған жағдайда ғана шығуға болады. Не болмаса Алматы қалалық энергетикалық компаниясына тапшы электр қуатын Орталық Азия аймақтық энергетика жүйесінен сатып алу мүмкіндігі берілуі қажет»,- деп санайды компания басшылығы.
«Алматы қаласының басшылығы мен «АПК» АҚ тарапынан электр қамтамасыздығы проблемасын реттеуге қажетті шаралар толыққанды қолданылуда»,- деп хабарлайды компанияның баспасөз қызметі.