Минскде төтенше жағдайлар жөніндегі ТМД сарапшылар тобының отырысы өтеді

12-13-сәуірде Минск қаласында төтенше жағдайлар жөніндегі ТМД сарапшылар тобының отырысы өтеді. Онда Табиғи және техногендік сипаттағы төтенше жағдайлардың алдын алу және залал-зардабын жою саласындағы өзара ықпалдастық туралы келісімге өзгерістер мен толықтырулар енгізу жөніндегі хаттаманың жобасы мен табиғи және техногендік сипаттағы төтенше жағдайлар жөніндегі мемлекетаралық кеңеске қатысты тәртіптер келісіледі. Бұл туралы KZ-today тілшісіне ТМД бас пәтерінен хабарлады.

Отырысқа Әзербайжан, Армения, Беларусь, Қазақстан, Қырғызстан, Молдова, Ресей, Тәжікстан, Түрікменстан, Өзбекстан және Украина өкілдері қатысады.

Табиғи және техногендік сипаттағы төтенше жағдайлар жөніндегі мемлекетаралық кеңестің 2004-жылғы қыркүйектегі ХҮІІІ отырысында хаттама жобасын кеңес мүшелері қабылдап, оны белгіленген тәртіп бойынша ТМД үкімет басшылары кеңесінің талқысына ұсынуға шешім қабылданды.
ТМД-ға қатысушы 10 мемлекет бұл құжаттың жобасына оң көзқарас танытты. Түрікменстан мен Өзбекстан құжатқа қатысты өз пікірлерін хабарламаған. Ал Әзербайжан, Қазақстан, Ресей мен Украина оған қатысты бірқатар ұсыныстар мен толықтырулар ұсынды.