Қазақстанның Дүниежүзілік сауда ұйымына мүшелікке өтуі жөнінде Австралия және Канадамен келісу ғана қалды

Дүниежүзілік сауда ұйымына мүшелікке өтуі жөнінде Қазақстан "әлем елдерінің басым бөлігімен келісімге келді". Бұл туралы бүгін, 21-қазанда Елбасы Нұрсұлтан Назарбаев Қазақстанда аккредитацияланған дипломатиялық миссиялардың жетекшілерімен Астанадағы кездесуінде құлағдар етті,- деп хабарлайды KZ-today тілшісі.

«Біз АҚШ-пен принциптік тұрғыда уағдаластық. Еуроодақпен де қиындықтар болмайтын сыңайлы. Ендігі жерде тек Австралия және Канада елдерімен ғана мәмілеге келу қалып отыр»,- деді президент.

«Қазақстан алдағы жылы Дүниежүзілік сауда ұйымына мүшелікке өтуді межелеп отырғаны белгілі. Бұл ұйымға мүше елдердің нарығындағы тауарлар мен қызмет түрлеріне өзара қол жеткізу мүмкіндігін беріп, отандық кәсіпорындарға бизнес жүргізудің халықаралық стандарттарына көшуге қуатты ынталандыру оқиғасы болмақ»,- деді мемлекет басшысы.