Азия Кубогы үшін триатлоннан өткен байрақты дода шілденің 18-і күні өтті. Негізінен, Көкшетау қаласында Азия Кубогы екінші рет өткізіліп отыр. Өткен жылдан бастап ол әлемдік рейтингіде рейтингілік ұпайларды жинайтын жарыстар құрамына енген.
Биылғы жарысқа барлығы сегіз мемлекеттен, атап айтқанда, Қазақстан, Австрия, Үндістан, Израиль, Беларусия, Ресей, Өзбекстан мен Чехиядан барлығы 83 спортшы (ерлер элитасы — 24, әйелдер элитасы — 3, жастар арасында, жігіттер — 46, қыздар — 10) қатысты.
Тартысты доданың нәтижесінде қазақстандық триатлонистер жоғары орындарға қол жеткізді. Мәселен, ерлер элитасында 1-ші орынды Дмитрий Смуров иеленді, ол өз спортшытымыз Дмитрий Гаагты 24 секундқа озып шықты, үшінші орын Беларусиядан келген Александр Васильевке бұйырды. Әйелдер элитасы арасында 1-ші орынды сондай-ақ, қазақстандық Екатерина Шатная жеңіп алды, 2-ші орынды ресейлік Екатерина Акимова алса, 3-ші орынға қостанайлық Әсем Уаисова табан тіреді.
Азия Кубогы үшін доданы жастарымыз да үлкен табыспен аяқтады. Қыздар арасында, Көкшетау қаласындағы Триатлон мектебінің оқушысы Каролина Соловьева Үндістаннан келген Чаоруши Пуджа Нарешханы озып шығып, 1-ші орынды иеленді, 3-ші орынға қостанайлық Ольга Радзиевская қол жеткізді. Жігітер арасында 1-ші орынды Джавохир Юнусов (Өзбекстан), екінші және үшінші орындарды сәйкесінше Триатлон мектебінің (Көкшетау) оқушылары Айдар Қапаров пен Антон Портнягин бөлісті.
Айта кетерлігі, Қазақстанда халықаралық деңгейдегі жарыстарды ұйымдастыру сапасы жыл сайын артып келеді және оған қатысатын мемлекеттер өкілдерінің саны да өсе түсуде. Осы ретте, 2011-ші жылы Қазақстанда Азия Чемпионатын өткізу жоспарлануда.