Жазғы Азия ойындарында Қазақстанның ауыр атлеттері 3 алтын медаль алуды жоспарлап отыр - бапкер Вилорий Пак

Қараша айында Қытайдың Гуанджоу қаласында өтетін жазғы Азия ойындарына қатысатын ауыр атлеттердің бабы жаман емес. Бұл туралы бүгін Алматыда ҚР «Динамо» дене шынықтыру және спорт қоғамының 85 жылдық мерейтойына арналған баспасөз мәслихатында айтылды.

«Әлем чемпионаты мен Азия ойындарына дайындық қаңтардың 16-сында басталған болатын. Әлем чемпионатында жігіттер үздік нәтижеге қол жеткізе алмады. Спортшыларды зорықтырып жіберген сияқтымыз. Қазір олар бабына қайта келе бастады», — дейді ҚР Еңбек сіңірген жаттықтырушысы Вилорий Пак. Ұлттық құраманың аға бапкерінің айтуынша, Азия ойындарында қазақстандықтар 3 алтын медаль алуды жоспарлап отыр. Жалпы спортта кездейсоқтық деген болмайды. Спортшының бағын ашатын — талант. Қазір дарынды жастар көп. Бапкерлер қазір іріктеу жүргізуге мүмкіндік алып отыр.