«Қыз қуу» жарысына бес облыстың командалары қатысты. Шығыс Қазақстаннан келген Еркеназ Айтышева мен Данияр Оразовтың жұбы ең мықты болып шықты. Ақтөбелік Юля Сенкевич пен Александр Карпенко екінші орынға ие болды.
«Теңге ілу» жарысында 16 адам білек сынасты. Оңтүстік Қазақстан облысынан келген Түймебек Жұмалиев 150 метр қашықтықты 18,65 секундта шауып өтіп, жердегі бес теңгенің үшеуін іліп әкетті де, бас жүлдеге ие болды. Екінші орынды оралдық Жанболат Қуанышқалиев иеленсе, Ақтөбе тұрғыны Мағжан Әндіров қола медальға ие болды.
«Аударыспақ» ұлттық ойынымызда ат үстіндегілер күш сынасты. Жеңімпаздар 50, 60, 70, 80 және 80 келіден жоғары салмақ санаттары бойынша анықталды.
Ал көкпар сайысының бас жүлдесіне автокөлік тігілген болатын. Ақтық сайыста оңтүстікқазақстандықтар ақмолалықтарды 9:1 есебімен жеңіп, Қазақстанның бес дүркін чемпионы болды. Алтын медальдан басқа олар «Жигули» ВАЗ-2107 жүлдесін қанжығаларына байлады.
