Бүгін Астанада өткен баспасөз мәслихатында ҚР Қорғаныс министрлігі Спорт комитетінің төрағасы Ерлан Таласбаев осылай мәлім етті.
Оның айтуынша, 2011 жылы шілденің 16-24-і күндері аралығында Бразилияның Рио-де-Жанейро қаласында өтетін V Бүкіләлемдік әскери ойындаына дейін көктемде командалық топтарды іріктеу сайыстары өткізілмек. Спорт мамандары әскерилер арасындағы спартакиада барысында жоғары көрсеткіштерге ие болған спортшыларды таңдайтын болады. «Негізі, Дүниежүзілік спорт ұйымы аясында 20 спорт түрлері бойынша жарыстар өткізіледі. Әрине, біз барлық спорт түрлеріне қатыса алмаймыз. Себебі кейбір жарыстар бойынша бізге әлі де біраз дайындық жасау қажет. Ал бокс, күрес, волейбол, баскетбол және тағы басқа спорт түрлері бойынша біздің дайын командаларымыз бар. Сондықтан алдағы V Бүкіләлемдік әскери ойындарына біз 60-70 адамдық команданы алып баратын боламыз деп ойлаймын. Біз осы жарыстарда өз командамыздың абыроймен қатысуын көздейміз», — дейді Е.Таласбаев.
