Өткен демалыс күндері Мойылды шипажайында теннисшілер Қытайдың Гуанчжоу қаласында басталатын Паралимпиадалық Азиада қарсаңындағы соңғы дайындықтарын өткізді, — деп хабарлады мүгедектердің облыстық қоғамдық ұйымының төрағасы, республикалық құраманың мүшесі Георгий Четвериков. Оның айтуынша, Мойылдыда теннистен республикалық турнир алғаш рет өткізіліп отыр.
— Біз бұл шараны ілкі жоба ретінде қарастырып отырмыз, мүмкіндіктері шектеулі теннисшілердің мұндай жарысын алдағы уақытта дәстүрге айналдырмақпыз, — дейді Г.Четвериков.
«Мұнда мүгедек спортшыларға жақсы жағдай жасалған. Таза ауа, шипалы балшық, жайлы палаталар, қоларбамен жүретіндерге арнайы жасалған жағдайлар, үлкен спорт залы, бәрі-бәрі бар. Біз Азиада қарсаңында жақсы дайындық өткіздік, елімізді жаңа жетістіктермен қуантуға тырысатын боламыз», — деді турнирге қатысушылар.
