Төрт күнге жалғасатын байқауға Қазақстан, Қырғызстан, Өзбекстан, Ресей және Қытай елдерінен 10-16 жас аралығындағы барлығы 143 музыкант қатысуда. Олар үш аталым бойынша өнер көрсетеді: фортепиано (74 қатысушы), скрипка (43) және виолончель (26). Байқаушылар жас ерекшеліктеріне байланысты үшке бөлінді — 10 жасқа дейін, 13 және 16 жасқа дейінгі топтар.
Музыка өнерінің хас шеберлерінен құралған қазылар алқасының төрайымдары Қазақ ұлттық өнер университетінің ректоры Айман Мұсақожаева мен «Дарын» республикалық ғылыми-тәжірибелік орталығының директоры Тілдәш Битуова журналистерге берген баспасөз мәслихатында дәстүрлі халықаралық байқаудың басты мақсаты — музыка өнері саласындағы дарынды балаларды анықтау, оларды қолдау және кәсіптік бағдар беру, қазақстандағы ұлттық мәдениетті дамыту, әлемдік және отандық мәдениеттің ең үздік үлгілерін насихаттау, сондай-ақ жас музыканттардың достық қарым-қатынастарын нығайту екендігін атап өтті.
Жүлдегерлер мен жеңімпаздар 10 желтоқсан күні Қазақ Ұлттық өнер университетінің Орган залында марапатталады.
