Бағлан Майлыбаевпен бірге қамауға алынған Николай Галихинді мемлекет басшысы бір ай бұрын "Құрмет" орденімен марапаттаған еді
Мемлекеттік құпияны таратты деген күдікке ілінген ҚР Президенті Әкімшілігінің бұрынғы қызметкері Николай Галихин бір ай бұрын "Құрмет" орденінің иегері атанған. Дүйсенбі күні Қазақстан ҰҚК хабарлағандай, сот ҚР Президенті Әкімшілігі басшысының бұрынғы орынбасары Бағлан Майлыбаевты екі айға қамауға алды. Майлыбаевпен бірге президент әкімшілігінің тағы бір қызметкері қамауға алынған – Н. Галихин. Ақорда сайтының ресми мәліметі бойынша, Николай Галихин президент әкімшілігі ішкі саясат бөлімі меңгерушісінің орынбасары болған екен. "Казахстанская правда" газетінің жариялауынша, Галихин былтыр Тәуелсіздік күні қарсаңында "Құрмет" орденімен марапатталған.
