2004-жылдың маусым айында Қазақстанда тұратын халық саны 15 миллион адамнан асты - ҚР статистика жөніндегі Агенттігі

Әр ай сайын жаңаланып отыратын ресми мәліметтерге сәйкес, Қ.Әбдиевтің айтуынша, 1-маусым күнгі жағдаймен Қазақстан тұрғындарының саны 14 миллион 999 мың 793 адамды құрады. Яғни, 15 миллион деген көрсеткішке небәрі 207 адам жетпей қалған. Туылу мен көші-қонның оң сальдосын ескергенде, 15 миллионыншы Қазақстан тұрғыны «маусым айының басында дүниеге келді»,- деді агенттік төрағасы.

Агенттік мәліметіне сәйкес, 2004-жылдың қаңтар-сәуір айларында Қазақстан Республикасындағы туылу көрсеткіші 88,6 мың адамды құрады, бұл 2003-жылғы осы мерзімдегі көрсеткішпен салыстырғанда 5,7 процентке артық. Туылу коэффиценті әрбір 1000 тұрғынға шаққанда 17,5 баладан келді, ал 2003-жылы бұл көрсеткіш 16 болатын. Өлім көрсеткіші 0,2 -ге кеміп, әрбір 1000 тұрғынға шаққанда 10,2 адамды құрады.
2004-жылдың бірінші тоқсанында Қазақстанның қазіргі заманғы тарихында алғаш рет республикамыздағы сыртқы көші-қон оң көрсеткішті құрады. Көші-қон сальдосы 2,5 мың адам болды. Ал 2003-жылдың 1-тоқсанында бұл көрсеткіш минус 2,9 мың адам болған. Қазақстанға негізінен ТМД елдерінің азаматтары тұрақты тұруға көшіп келіп жатыр.