-Жүргізушілердің үрейін туғызған көше, міне, осы. Нақ осы жерде қара киінген белгісіз біреу көліктерді бірінен соң бірін өртеген. Ал ең соңғы өртенген көлік міне мынау. Қаскөй оны ендігі жарамастай етіп жанармай құйып жандырып жіберіпті.
Қатты жарылыстан шошып оянған жұрт далаға қарай тұра қашқан. Алаулап жанған көлікті көріп, су шашып сөндірмек болыпты. Бірақ өшірмек түгілі, жанына да жолай алмады. Жан-жақты шарпыған алапат өрт қасындағы көлікті де күл-талқан етті.
Бұл жігіттің осымен екінші көлігі өртеніп кетті. Өткен жылы жазда ол су жаңа «Тойотасынан» айырылған. Ал түнде алаулап жанған «Матизды» Евгений әлі айдап та үлгермепті.
Евгений Махонин, жәбірленуші:
-Тарс еткен дыбысты естіп жүгіріп шықтым. Бірақ, бәрі кеш еді. Көлікті құтқара алмадым. Жақында ғана сатып алған едім. Енді жаяу қалдым.
Жайымен тұрған көлікті өртегіштер қалада былтыр жазда пайда болған. Ол кезде қара киінген әлдебіреу бейнебақылау камерасына түсіп те қалған. Оның жанармай толы ыдысын автотұраққа сүйретіп әкеліп, артынша қаңтарылып тұрған көлікке шашып жүргені анық көрініп тұр.
Осылайша өткен жылы бес көлік өртенді. Полиция биылғы оқиғаға байланысты ұсталған 20 жасар қыздың былтырғыға да қатысы болуы мүмкін дейді.
Салтанат Әзірбек, Алматы қалалық ІІД баспасөз хатшысы:
-Бөтен адамның мүлкін қасақана жою ісіне қатысы бар азаматшаны құрықтаған болатын, бірнеше сағат бұрын. Ол сол Алмалы ауданының тұрғыны болып шықты. Былтыр төрт бөтеннің автокөліктерін қасқана жандыру фактісі орын алған. Бұл кісі алдын ала болжамымыз бойынша осы фактілерге қатысты.
Көшедегі көліктерге қырғидай тиген бойжеткен жанармайдан бөлек газ баллондарын да өзімен алып жүріпті. Қауіпті жарылғышты ол жүк салғышқа қыстырып барып, от қойған. Қыруар шығынның орны толтырыла ма, жоқ па, әзірге белгісіз. Өйткені алауға жақын арудың есі ауысқан болуы мүмкін.