Таңғы 3:30 шамасында 19 және 20 жастағы жігіттер қарт кісінің ту сыртынан келіп, жамбасқа алып ұрған. Жалма-жан қолындағы телефонын тартып алып тұра қашқан.
Жерге құлаған зейнеткердің қос тізесі бірдей сынып кеткен. Жапа шеккен зейнеткер ауруханада 1 аптадай комада жатты.
«Жедел іздестіру шаралары барысында күдіктілер көп ұзамай ұсталды. Себебі, 19 және 20 жастағы жігіттер қалада тұрмайды екен. Олар зейнеткердің қарсы тұра алмайтынын білген. Келесі күні әлгілер телефонды 7 мың теңгеге сатып жіберген. Қазір аталған дерек бойынша ҚР ҚК 192-бабымен сотқа дейінгі тергеу жұмыстары жүріп жатыр. Күдіктілер кінәларын мойындады. Олардың бірі бұрын ұрлық үшін істі болған", — деді Алмалы аудандық ІІБ басшысы Данияр Мендебаев.