Жарияланды: 30

Ата-аналардан жиналған ақша қандай жағдайда жемқорлық болып есептеледі?

Ата-аналардан жиналған ақша қандай жағдайда жемқорлық болып есептеледі?

Осылай бақылап отыру арқылы ғана тұрмыстағы жемқорлықтың алдын аламыз, деді агенттік төрағасының орынбасары.

Бұдан былай Қазақстандағы мектептер мен балабақшалар бюджет қаражатын қайда жұмсағандары туралы ақпаратты өз сайттарында жариялап отырады. Осылай мәлімдеді ҚР мемлекеттік қызмет істері сыбайлас жемқорлыққа қарсы агенттігі төрағасының орынбасары Олжас Бектенов, деп хабарлады Sputnik тілшісі.

Олжас Бектенов білім беру жүйесінде сыбайлас жемқорлықты жоюға бағытталған ағымдағы жұмыстар туралы әңгімеледі. Сондай-ақ, ол білім беру ұйымдарында кез келген алым-салым болмауы тиіс екенін айтып өтті. 

"Ата-аналар білім беру ұйымдарындағы жөндеу немесе әртүрлі іс-шараны өткізу жұмыстарына өз қалтасынан қандай да бір ақша жинауға міндетті емес. Яғни мұндай фактілер болған жағдайда жемқорлық ретінде қарастырылады. Өйткені осы мақсаттар үшін бюджеттен жеткілікті мөлшерде қаражат бөлінеді", — деді Олжас Бектенов.

Сондай-ақ, агенттік төрағасының орынбасары мұндай жағдайлардың алдын алып отыру қажеттігін атап өтті. Осыған орай, Олжас Бектенов мектептер мен балабақшаларда жемқорлық мәселесін шешу үшін қаражаттың қайда жұмсалатыны туралы ақпаратты міндетті әрі ашық түрде жариялап отыруды ұсынды. Өйткені, бұл бюджеттің қаражатын өз орнымен жұмсауға және жемқорлық әрекеттердің болмауына тікелей әсер етеді. 

"Білім беру мекемелерінде қамқоршылық кеңестің есептері ресми түрде ашық әрі қолжетімді болуы тиіс. Мұнымен қатар, уәкілетті орган осы мәселені бақылауға және шот ашуға мониторинг жүргізуі керек", — деді ол.

Бұдан өзге Олжас Бектенов мектептер мен балабақшалар бюджет туралы ақпартты өз веб-сайттарында жариялап отырулары тиіс екенін айтып өтті. 

"Осылай бақылау жүргізу арқылы ғана тұрмыстағы жемқорлықты жоюға болады", — деп қорытты спикер.

 

Пікір қалдырыңыз

Пікір қалдыру тіркелген пайдаланушылар ғана мүмкін

Закрыть