Атырауда 98 мүгедек баланы күштеп жұмысқа жеккен. Бұл туралы биылғы жылдың жартыжылдығына қорытынды жасаған есебінде облыстық прокуратура мәлімдеді, деп хабарлайды Zakon.kz.
Облыстық прокуратураның мәліметінше, 98 мүмкіндігі шектеулі бала тұрып жатқан №3 Арнаулы қызмет көрсету орталығында қатыгездік таныту мен күш көрсету фактілері орын алған. Оның үстіне ата-анасының қарауынсыз қалған кембағал жеткіншектерді күштеп еңбекке тарту жайты да тіркелді.
Атырау облыстық прокуратурасының айтуынша, 322 оқушысы бар ұлттық дарынды балаларға арналған гимназияда жылына 4 рет демалысқа жіберілуі тиіс жетім және мүгедек балалар тек екі рет каникулға шыққан. Осы оқиғаны облыс прокуратурасы анықтаған соң балалар тиісті демалысын қосымша алатын болып шешілді.
— Осы фактілердің барлығы облыстық прокуратураның бірыңғай тізіліміне алынып, қазір сотқа дейінгі тергеу амалдары жүріп жатыр, – дейді прокурор өз сөзінде.