Кездесу барысында «Дженерал Электрик» компаниясының Қазақстанда жүзеге асыруға ниеттеніп отырған бағдарламалары талқыланды.
«Біз биылғы жылы 200 электровозды жаңғыртып, жылына 100 электровоз құрастыратын кәсіпорын салатын боламыз. Біз «Дженерал Электрик» көп қырлы компаниясының серіктесіне айналып отырғанымызға қуаныштымыз», — деп атап өтті мемлекет басшысы.
Фердинанд Беккалли журналистерге арналған брифингте:
«Компания Қазақстанның локомотив паркін жаңғырту бойынша нақты көмек көрсетуге ниетті, және жаңа локомотивтер шығару жөніндегі технологияларды жеткізуге әзір. Сонымен бірге, «Эйр Астана» әуе компаниясы қазірдің өзінде авиациялық қозғалтқыштар жеткізу бойынша «Дженерал Электрик» компаниясының тапсырыскері болып табылады. Әуе тасымалының артуын ескере отырып, біз «Эйр Астана» компаниясымен одан әрі ынтымақтастықтың жолдарын қарастырудамыз», — деді.
Компания президенті «Дженерал Электрик» мұнай-газ, электр энергиясы, денсаулық сақтау салаларына арналған жабдықтармен, сондай-ақ суды тазалау мен тұщыландыру құралдарымен қамти алатынын атап өтті.
«Ынтымақтастық бағыттарының тізбесі компания мен Қазақстан Үкіметі қол қойған Өзара түсіністік жөніндегі меморандумда айқындалған. Сондықтан да, біз алға қойған бағыттарды ұстанып, бірлескен қызметтің нақты нәтижелері болуын бақылауға тиіспіз», — деп атап өтті «Дженерал Электрик» компаниясының басшысы.
Ақпаратты пайдаланған жағдайда «Казахстан Сегодня» ақпараттық агенттігіне сілтеме жасау міндетті