Түркістан облысында егде жастағы әйел мен оның қызын аяусыз соққыға жыққан күдікті ұсталды, — деп хабарлайды Tengrinews.kz тілшісі.
"Жедел-іздестіру шаралары барысында Келес аудандық полиция бөлімінің қызметкерлері күдіктіні ұстап, бөлімшеге жеткізді. Қазіргі уақытта оқиғаның мән-жайы анықталып жатыр. Сотқа дейінгі тергеу жүріп жатыр. Бұл дерек ҚР Қылмыстық кодексінің 107-бабы және 149-бабы бойынша сотқа дейінгі бірыңғай тергеу реестріне тіркелді", — деп хабарлады облыстық полиция департаментінің баспасөз қызметіндегілер. Ведомство мәліметінше, күдікті қамауға алынды. Еске салайық, бұл оқиға 15 тамызда болған. Кейінірек оқиға орнында түсірілген видео әлеуметтік желілерде пайда болған еді.