Ақтөбенің атқамінерлеріне Шалқар қаласындағы балабақша ғимаратына қатысты шу сабақ болмаған сыңайлы.Айдаладағы ауылда 150 миллион теңгеге ескі нысан сатып алғанда облыс басшысына Елбасының өзі ескерту жасаған. Бірақ одан бірде бір шендінің мұрты қисайған жоқ. Шу шыққан кезде сол Шалқар ауданын басқарған Рахат Сыдықов облыс орталығы іргесіндегі Қарғалы ауданына ауысып кетті. Осыдан кейін еркінсісе керек, енді Ақтөбе шенеуніктері Қурайлы ауылындағы құр қабырғасы қалған ғимаратты сатып алуға 30 млн теңге жұмсапты.
Жақсылық Үмбетқалиев, Ақтөбе облыстық мемлекеттік қызмет істері жөніндегі департаменті басшысының орынбасары:
—Қурайлы ауылынан мәдениет үйі үшін ғимарат сатып алу кезінде заңсыздықтарға жол берген. Себебі, оған ешбір коммуникация жүргізілмеген. Суы мен жылуы, жарығы мүлдем жоқ. Сол ақшаға жаңа мәдениет үйін тұрғызуға болады.
Қурайлы аулындағы бұл нысан 20 жылдай жекенің қолында болыпты. Енді шенеуніктер мәдениет үйі үшін осыдан артығы жоқ деп отыр. Себебі, жаңа құрылысты бастауға ауылдан бос жер табылмаған көрінеді.
Мақпал Тұрмағанбетова, Қурайлы ауылдық аймағының әкімі:
-Орталықта жер жоқ. Мәдениет үйі ол орталықта болуы керек. Орталықта кәдімгі халық шоғырланатын жерде болу керек.
Қыруар қаржыға сатып алынған бұл ғимаратты қайта қалпына келтіру үшін қала басшылары қазынадан қосымша ақша іздеп жатыр. Қазір жобалық-сметалық құжаттар әзірленуде. Ал дауды ушықтырмас үшін қалалық мәдениет бөлімінің басшысы Маржан Қорғанбаева кінәлі деп танылыпты. Әкімдіктегілер оны қызметінен кетірдік деп құзырлы органдарға есеп беріп құтылды.
-Ақтөбелік шенеуніктер әсіресе тендерден теңге қарпудың шебері. Жемқорлық бойынша бұл өңір қазір алдыңғы үштікті бермей келеді. Айта кетсек, кеше ғана Ақордада сыбайлас жемқорлыққа қатысты өткен жиында осы аймақтағы қылмысты тыя алмағаны үшін облыстық қаржы полициясының бастығы Жанұзақ Сабыржан қызметінен қуылған болатын.