«Семей. 1-ші ЖЭО. Қайта жөндеу. Қысқа дайындығын тексердім», — деп жазыпты К. Мәсімов сәрсенбі күні Twitter-дегі жеке парағына.
«(Семейге — ҚазТАГ) сапары барысында ҚР премьер-министрі «Теплокоммунэнерго» МКК-сінің 1-ЖЭО-сында болды (жылу және электр қуатын өндіру). К. Мәсімов энергетикалық кешен кәсіпорындарының күз-қыс маусымына дайындық барысымен, соның ішінде, Семейді жылумен қамту жүйесін жаңарту және қайта жөндеу бағдарламасын жүзеге асыру барысымен танысты», — деп хабарлайды премьердің сайты.
Ақпаратта атап көрсетілгендей, үкіметтің қаулысымен бекітілген Семейді әлеуметтік-экономикалық дамыту жөніндегі кешенді жоспарды жүзеге асыру аясында биыл республикалық бюджеттен жоспарды жүзеге асыруға және су жылытатын қазандықтың бірінші және екінші кезектерінің құрылысын аяқтауға Т7 млрд-тан аса қаржы бөлінді.
Бұрын хабарланғандай, былтырғы жылыту маусымында Семейдегі 1-ЖЭО-да 5 қаңтарда апат болды. 3 қазандықтың жұмысы тоқтатылды. 7 қаңтарда тағы 1 қазандық істен шықты. Қаланың сол жағалауында тұрғын үйлердегі температура +8-10 градустан аспады.
Премьер-министрдің тапсырмасымен индустрия және жаңа технологиялар вице-министрі Альберт Рау бастаған республикалық комиссия апаттың себебін тексерді. А. Рау себептердің бірі ретінде жылу орталығының жылыту маусымына дайындығы сапасының төмен болғанын атады.
Апаттан кейін Семейге жаңа әкім тағайындалды: «жылумен қамту нысандарын дайындау жұмыстарын тиісті деңгейде ұйымдастырмағаны, жылу көздерінің жұмысына тиісті бақылаудың болмағаны және апатты жағдайда шара қабылдамағаны үшін» қызметінен алынған Мейрамхат Айнабековтың орнына Айбек Кәрімов келді.