Ақпарат және қоғамдық даму министрлігі танымал сайт неге бұғатталғанын түсіндірді, — деп хабарлайды Tengrinews.kz.
"Pinterest сайтына қатысты айтсақ, интернет-ресурсқа кіру Цифрлық даму, инновациялар және аэроғарыш өнеркәсібі министрлігінің 2019 жылғы 31 желтоқсандағы және 2020 жылғы 13 қаңтардағы интернет-казино жарнамасына байланысты ұйғарымдары негізінде заңсыз контент сілтемелерін таратқаны үшін шектелгенін хабарлаймыз.
Pinterest.com-ды шектеуге негіз болған барлық материал әлі де тұр, яғни заңбұзушылықтар жойылмады", — деп түсіндірді Ақпарат министрлігіндегілер.
Ведомство өкілдері интернет-ресурсқа заңсыз контентті жою қажет екені туралы хабарлама-хаттар жіберілгенін атап өтті.
Министрлік мәліметінше, Pinterest сервисінің мобильді қосымшасы Қазақстанда штаттық режимде жұмыс істейді. Алайда қолданушылар қосымшаға кіргенде ара-тұра проблемалар болатынын айтады.
Pinterest (Пинтерест) — онлайн режимінде суреттер жүктеуге, оны қандай да бір тақырып бойынша топтамаға салып, бөлісуге мүмкіндік беретін әлеуметтік интернет-сервис, фотохостинг.
Statcounter Global Stats деректері бойынша, Pinterest Қазақстандағы ең танымал әлеуметтік желілердің бірі.