Жарияланды: 670

Қазақстан үкіметі Қарашығанақ кенішін игеру жобасының үшінші сатысын жедел жүзеге асыруда табандылық танытады - ҚР Елбасы

"Қазақстан үкіметі Қарашығанақ кенішін игеру жобасының үшінші сатысын жедел жүзеге асыруда табандылық танытады". Бұл туралы бүгін, 1- тамызда Қарашығанақтың сұйық көмірсутегін Каспий құбыр желісі арқылы экспортқа жіберу салтанатына қатысқан Елбасы Нұрсұлтан Назарбаев мәлімдеді,- деп хабарлайды KZ-today тілшісі.

Осы орайда Н.Назарбаев : "Қарашығанақ кенішін одан әрі жетілдіру бағдарламасы ендігі жерде газ жобасына байланысты. Өнім бөлісу жөніндегі негізгі келісімге сәйкес газ жобасы аясында газ өңдеу зауыты мен экспорттық газ құбыры салынады",- деді. "Менің тапсырмам бойынша қазір бұл жобаның техника-экономикалық негіздемесі жасалуда, негіздеме жобасы 2003-жылдың күзінде аяқталып , одан әрі жоба тәжірибе жүзінде іске асады",- деп хабарлады Елбасы. Н.Назарбаевтың пайымдауынша, бұл - мұнай химиясы саласының қарқынды дамуына және экспорттық өнімдер өндірісін салуды пәрмендендіруге жағдай жасайды. Кенішті игеру жобасының екінші сатысының аяқталғандығы туралы түсініктеме берген Елбасы "өндірістік кешен құрылысын салуға атсалысқан 9 мың адам жобаның кезекті сатысына жұмылдырылады",- деп хабарлады. "Баршамыз алға қойып отырған басты мақсат- конденсат өндіру жөніндегі жылдық көлемді жылына 12 млн. тоннаға , ал газ өндіру көлемін 20 млрд. текше метрге жеткізу болып табылады",- деді Н.Назарбаев. Н.Назарбаев алдағы уақытта Қарашығанақ кеніші көмірсутегі шикізатын терең өңдеуші еліміздегі ірі орталыққа айналады дегенге сенім білдірді.

Пікір қалдырыңыз

Пікір қалдыру тіркелген пайдаланушылар ғана мүмкін

Закрыть