Қазақстанда «Экспорттық-импорттық операциялар бойынша жалғыз терезе» интеграциялық ақпараттық жүйесі 2013 жылы іске қосылады

Бұл туралы бүгін Үкімет отырысында ҚР Қаржы министрі Болат Жәмішев мәлім етті. «Толықтай алғанда 2013 жылы жоспарға сәйкес бұл ақпараттық жүйені толығымен іске қосуға болады деп ойлаймын», - деді ол. Министрдің атап өтуіне қарағанда, ағымдағы жылы электрондық декларацияларға ілеспе құжаттарды ұсыну бойынша процедураларды қосу жоспарлануда. «Келесі жылы жасап бітірсек, 2013 жылы сыртқы экономикалық қызмет қатысушыларымен өзара қарым-қатынасты толығымен электрондық форматқа көшіруге мүмкіндік бар», - деді Б.Жәмішев. Оның айтуынша, қазіргі таңда халықаралық саудаға қатысушы компаниялар кеден органдарына ұсыну үшін қажетті түрлі рұқсат қағаздарын, лицензиялар алуға көп уақытын жоғалтып отыр. Мәселен, экспорттық-импорттық операциялар бойынша әртүрлі мемлекеттік органдардан 14 және 17 құжат алу қажет. Ал «е-терезе» ақпараттық жүйесі бойынша сыртқы экономикалық қызметке қатысушы мемлекеттік органдар беретін рұқсат беру құжаттары үшін қажетті барлық мәліметтер жүйеленген бір ғана құжат толтырады. Осыдан кейін экспорттаушы немесе импорттаушы аталған құжатты «е-терезе» ақпараттық жүйесіне жібереді. «Е-терезе» арқылы бақылауға қажетті ақпарат электронды түрде белгілі бір ведомствоға бағытталады.