Оны Caravan.kz медиа порталының тілшісі анықтап көрді.
Оңтүстік Кореяда өткен жергілікті сайлаудан кейін елде саяси дау күшейіп, мыңдаған адам көшеге шықты. Наразылық білдірушілер сайлау кезінде орын алған заңбұзушылықтар мен ұйымдастырудағы олқылықтарға байланысты дауыс беруді қайта өткізуді талап етуде.
Наразылықтың басты себебі – 3 маусымда өткен жергілікті сайлау кезінде бірқатар сайлау учаскелерінде бюллетеньдердің жетіспеуі. Орталық сайлау комиссиясының мәліметінше, елдегі 14 300 учаскенің 50-інде бюллетень таусылып, 22 учаскеде дауыс беру уақытша тоқтатылған. Кейбір сайлаушылар бірнеше сағат кезекте тұруға мәжбүр болған.
Осы жағдайдан кейін Сеулдегі Олимпиадалық саябақ аумағындағы гандбол аренасының маңына мыңдаған адам жиналды. Дәл осы жерде сайлау бюллетеньдерін санау жүргізілген. Наразылық білдірушілер сайлау нәтижелеріне күмән келтіріп, «Сайлауды қайта өткізсін!» деген ұрандар көтерген. Кейбірі Корея Республикасының мемлекеттік туын алып шыққан.
Жергілікті БАҚ-тың хабарлауынша, наразылық акциясына әсіресе жастар көп қатысқан. Сонымен қатар консервативті көзқарастағы белсенділер мен блогерлер де сайлау комиссиясының жұмысын қатты сынға алды.
Қоғамдағы ашу-ыза күшейген соң Орталық сайлау комиссиясының төрағасы қызметінен кететінін мәлімдеді. Ал ел президенті Ли Чжэ Мён болған жағдайды «демократия беделіне нұқсан келтірген оқиға» деп атап, жан-жақты тергеу жүргізуді тапсырды. Сонымен бірге ол сайлаудағы заңбұзушылықтар сайлау нәтижелерін бұрмалады деген айыптаулар әзірге дәлелденбегенін айтты.
Қазіргі уақытта тергеу органдары мен полиция сайлау процесіндегі кемшіліктердің себептерін анықтап жатыр. Ал наразылыққа қатысушылар сайлау нәтижелерін қайта қарауды және кейбір өңірлерде қайта дауыс беруді талап етуді жалғастыруда.