Бұл жайында «ҚазАвтоЖол» ұлттық компаниясының өкілдері ШҚО-дағы қоғамдық тыңдау барысында мәлім етті, деп хабарлайды Caravan.kz медиа порталы ҚазАқпарат-қа сілтеме жасап.
Ұзындығы 464 шақырым болатын М-38 тас жолының Павлодар – Семей – Қалбатау учаскесі биыл ақылы болады.
Павлодар облысында — 3, Шығыс Қазақстан облысында — 8 бақылау аркасы орнатылып, тест режимінде іске қосылды.
ШҚО-дағы ақылы учаске Семей мен Шар қалалары, сондай-ақ Аққулы, Бесқарағай және Жарма аудандары арқылы өтетін жолда болады.
Бұған дейін «ҚазАвтоЖол» Павлодар – Омбы жолы да ақылы болатынын хабарлаған еді.
Ақы алудың ашық жүйесі М-38 автожолының барлық учаскесіне енгізіледі.
Қытай Халық Республикасы шекарасынан Қалбатау ауылына дейінгі жол тегін болып қала береді.
Павлодар – Семей – Қалбатау учаскесі ІІ техникалық санаттағы жолға жатады. Яғни, жүк көліктері үшін ғана ақылы болады.
Жалпы, ШҚО халқы аймақ жолдарына ақылы жүйені енгізуді қолдады.
Бірақ, тұрғындар қызметтер мен азық-түлік бағасының өсуіне жол бермеу үшін жергілікті жүк көліктеріне, фермерлер мен коммуналдық қызмет техникасына жеңілдік қарастыруды сұрады.
Сондай-ақ, ШҚО тұрғындары Павлодар – Семей – Қалбатау жолын 4 қозғалыс жолағына дейін кеңейтуді, бөлу жолақтары мен мал өте алмайтын қоршау орнатуды талап етті.