14 ақпан күні Алматыда "Жарылған жүректер мұражайы" ("Музей разбитых сердец") ашылатыны туралы Radiotochka.kz хабарлады. Ұйымдастырушылар жылдағыдай наразылықтың алдын алғысы келген болуы керек, халықтың жанды жерінен соғыпты. Яғни бұл шараға әлеуметтік жоба деген айдар таққан. Сөйтіп, отбасыларға, жасөспірімдер мен әйелдерге көмектесуді мақсат еткен. Айта кетейік, бұл шара Ә.Қастеев атындағы мемлекеттік өнер мұражайының филиалында бір ай бойы өтеді.
Ұйымдастырушылар мұражайда адамдардың жеке мәселелерін бөлісіп, олардың шешімін табуға мүмкіндік алатынын айтады. Тіпті жасөспірімдерді ересек өмірге, жынысаралық, отбасылық қарым-қатынасқа бейімдеу үшін шеберлік сыныптары өткізілмек екен.
Айта кету керек, соңғы кездері қоғамда 14 ақпанды Махаббат күні деп атап өтуге наразылық күшейіп тұр. Өйткені бұл жыл сайын кәдімгі жын-ойнақ күніне айналып кетеді. Сондықтан қазір елімізде оған наразылық білдіріп жатқандар өте көп.
