Облыстың Жаңақорған ауданында ұйымдастырылған сынақ қорытындысына үлкен күмән келтірілді. Осыған орай мәселеге ҚР Білім және ғылым министрлігі араласып, тестілеудің бұл күнгі нәтижелерін түгелдей жойып, оны 10 маусымда қайта өткізуге шешім қабылдады.
Осыған байланысты кеше Жаңақорған ауданы әкімдігінде баспасөз мәслихаты өткізілді. Оған ҚР Білім және ғылым министрлігінің Қызылорда облысындағы өкілдері Ардақ Садықова, Исатай Сағындықов, облыстық білім басқармасының бастығы Жаңыл Жонтаева, Жаңақорған аудандық Ұлттық бірыңғай тестілеуді ұйымдастыру және өткізу жөніндегі мемлекеттік комиссияның төрағасы, аудан әкімінің орынбасары Болат Ибрагимов, аудандық білім бөлімінің бастығы Жұмабай Жәнібеков қатысты.
— Мектеп бітірушілердің мемлекеттік сынағына дайындық жұмыстары ауданда биыл да ойдағыдай жүргізілді. Осыған қатысты көлік мәселесі, олардың жол қауіпсіздігі, жатар орын, тамағы, бәрі де нұсқауға сай шешілді. Сол сияқты ҰБТ өткізілетін орын, оған қажетті құрал- жабдықтар алдын ала дайындалды, — деді жиынды ашқан Болат Ибрагимов. Ол өз сөзінде ҰБТ сынағының алғашқы легіне қатысуға 515 түлек өтініш білдірсе, оның 505-і келіп қатысқанын және олардың толықтай металл іздегіш құралдарымен тексеріліп, кіргізілгенін айтты. Сонымен бірге сынақ қорытындысы ҚР Білім министрлігінің шешімімен жойылып, оқушылардың қайта сынақ тапсыратындығын және мәлімдеді.
Ал ҚР Білім министрлігінің облыстағы өкілі Ардақ Садықова мұның жайын былай түсіндірді:
— Ұлттық бірыңғай тестілеу барысында мемлекеттік құпия құжатқа қол сұғу әрекеті байқалды деген күмән туды. Мемлекеттік құпияның ашылуы мемлекеттің қауіпсіздігіне сызат салады. Оның анығын тиісті орындар тексеру үстінде. Сондықтан да әзірге осындай шешім шығарылды.
Бұл пікірді жалғастырған Исатай Сағындықов келеңсіз жағдайға мектеп түлектерінің қатысы жоқтығын айта келіп, алаяқтардың жымысқылығының кесірі екендігін ескертті. «Балалардың болашағына залал келмесін деп, Білім министрлігі олардың қайта сынақ тапсыруына мүмкіндік жасап отыр. Сондықтан бұған түсіністікпен қарап, олардың қайта сынақ тапсыруына тиісті жағдайды жасау керек», деді ол.
— Биылғы түлектердің білім деңгейі төмен емес, — деді Жұмабай Жәнібеков. — Бәлкім, ҚР Білім министрлігінің балаларға сенім артып, ҰБТ-ны қайта тапсыруға мүмкіндік беруі сәттіліктердің бастауы болар. Сондықтан ата-аналардың бұған түсіністікпен қарап, сабырлылық танытқаны жөн. Оқушылар ҰБТ-ға жыл бойы жақсы дайындалды. Сынама тест қорытындысы бойынша орташа балл — 83,7 болған-ды. Балалардың біліміне сенуге болады деп ойлаймын.
Осылайша ауданда ҰБТ сынағы қайта тапсырылатын болып отыр.
