Д.Ақышев хабарлағандай, 2016 жылғы қыркүйектің қорытындысы бойынша, инфляция 0,2%-дық деңгейде, ал жыл басынан 5,6%-дық деңгейде қалыптасты, бұл дағдарысқа дейінгі кезеңнің көп жылдық мәндеріне сәйкес келеді. «Ұлттық банк алдағы 3-4 айда жылдық инфляция бойынша нысаналы бағдарға қол жеткізуді мүмкін деп санайды», — деп мәлімдеді Д.Ақышев.
Оның айтуынша, жылдық инфляцияның 8% деңгейге дейін төмендеуі ішкі бағалардың айырбастау бағамының жаңа өлшемдеріне бейімделу процесінің аяқталуын білдіреді. «Сондықтан Ұлттық банктің негізгі басымдығы жылдық инфляцияны белгіленген дәлізде 8% шегінде жылдам тұрақтандыру болып табылады. Онсыз инвестициялық белсенділікті қалпына келтіру және ұлттық валютадағы ресурстар бойынша мөлшерлемелерді төмендету мүмкін емес», — деп атап өтті Д.Ақышев.
«Тұтастай алғанда, қаржы нарығындағы ахуал тұрақты болып қалуда. Жұмыс істемейтін қарыздардың үлесі 2016 жылғы 1 қыркүйектегі жағдай бойынша банктердің жиынтық несие портфелінің 8,4%-ын (2016 жылғы 1 қаңтарда – 8,0%) құрады. Ұлттық банк қаржылық тұрақтылықты қамтамасыз ету бойынша жұмысты жалғастыратын болады. Ел экономикасындағы дағдарысты құбылыстардың сақталуы жағдайында Ұлттық банк қаржы нарығын реттеудің контрциклдық сипатын ұстанады, банк секторының жағымсыз оқиғаларға орнықтылығын тұрақты бағалауды жүргізеді», — деп қорытындылады Д.Ақышев.