Дәстүрлі бұл шара биыл Әлем чемпионы, полиция майоры Руслан Мұқановты еске алуға арналды.
«Бүгінгі таңда спорттың бұл түрі күннен-күнге қарқын алып, дамып келе жатқаны қуантарлық жағдай болып отыр. Бұл біздің дұрыс жолмен келе жатқандығымыздың белгісі. Аталмыш турнирге биыл 200 спортшыдан тұратын 34 команда қатысты. Ол қоян-қолтық ұрысының елімізде қаншалықты кең қанат жайып келе жатқандығын көрсете алады», — деді «Динамо» дене шынықтыру-спорт қоғамы Орталық комитеті төрағасының бірінші орынбасары Асқар Омарқұлов.
Оның айтуынша, бұл шараны «Динамо» ДШСҚ мен ҚР Қоян-қолтық ұрыс федерациясы және Руслан Мұқановтың туған-туыстары бірлесіп ұйымдастырды. Онда командалық есепте №0112 Республикалық ұлан командасы жеңімпаз атанды. Жүлделі 2-3 орынды ҰҚК-1 және ҚР Ішкі күштері өзара бөлісті. Жарыс кезінде Дене шынықтыру және спорт істері агенттігі төреші нормативін орындағаны үшін Сәкен Әбдіқұлұлы мен Арман Естемесовке жоғары дәрежелі төреші атағы берілді.