Бұл туралы бүгін Астанада өткен баспасөз мәслихатында ҚР Күрес федерациясының президенті, ФИЛА Бюросының мүшесі Дәулет Тұрлыханов мәлім етті.
Оның айтуынша, Астанадағы турнирдің қатысушылары арасында әлемдік және құрлықтық біріншіліктердің жеңімпаздары мен Азия және Олимпиада ойындарының жүлдегерлері сынды әлемнің азулы спортшылары бар. Қазақстандық палуандар 9 олимпиадалық жолдамаға таласатын болады. Елордалық шаршы кілемге 2008 жылғы Бейжің Олимпиадасының жүлдегерлері Марид Муталимов, Елена Шалыгина шығады.
Айта кетейік, осындай деңгейдегі халықаралық жарыс Қазақстанда алғаш рет өтіп отыр.
Турнирдің құрметті қонағы ретінде Астанаға Халықаралық күрес федерациясының президенті (ФИЛА) Рафаэль Мартинетти, Азиялық күрес федерациясының президенті Чанг-Кью Ким, сонымен қатар ФИЛА ұйымының Бюро мүшелері қатысады.
Жарыс 30 наурыз бен 1 сәуір аралығында «Дәулет» спорт кешенінде өтеді.
