Қазақстанда алғаш рет Чемпиондар лигасының негізгі кезеңінде мадридтік «Реал» өнер көрсетпек. Олардың қарсыласы отандық «Қайрат». Caravan.kz медиа порталы жалғастырады.
Мамандардың есебінше, бүгінгі матчқа 4 мыңнан астам шетелдік турист келеді. Қонақтардың қонақүйге, тамақтануға, көлік пен ойын-сауыққа жұмсайтын шығындары қала бюджетіне шамамен 3 млрд теңге кіріс әкелмек. Дегенмен, нақты экономикалық көрсеткіштер ойыннан кейін жарияланады.
Әлем жұлдыздарын қарсы алу
Испандық команданың келуі қазақстандық жанкүйерлер арасында аса қызығушылық туғызды. Түн уақытына қарамай ондаған, кейін жүздеген жанкүйер әуежайда футболшыларды күтіп алды. «Реал» ойыншылары тоқтаған қонақүйдің алдында да жанкүйерлер жиналып, кумирлерін бір сәтке болса да көруге үміттенді. Осындай көрініс Орталық стадион маңында да қайталанды.
«Мен мұнда фанаттардың атмосферасын сезіну үшін келдім. «Реал Мадрид» тарихта алғаш рет Алматыға келді. Бұл мен үшін өте қызық. Футболшыларды шынайы өмірде көргім келеді», — дейді жанкүйерлердің бірі.
Ойынға дайындық
Кездесу 30-қыркүйек күні сағат 21:45-те Орталық стадионда басталады. Кеше командалар жаттығулар мен баспасөз мәслихаттарын өткізді. «Қайраттың» бас бапкері Рафаэль Уразбахтин алматылық команданың өзіндік тактикалық жоспары бар екенін атап өтті:
«Ойыншыларымыз барынша жақсы формада. Біз лайықты деңгейде өнер көрсетуді мақсат тұтамыз. Мұндай кездесулер бізді шыңдайды, ілгерілетуге көмектеседі. Маңыздысы ойын барысында тұрақтылықты сақтау», — деді ол.
Қауіпсіздік пен тәртіп
Алматыда бұл ойынға ауқымды дайындық жүріп жатыр. Қауіпсіздікті қамтамасыз ету үшін 2,5 мың полиция қызметкері жұмылдырылмақ. Қала тұрғындары мен қонақтарын тазалықты сақтауға, бір-біріне құрметпен қарауға шақырды. Бұл — Алматы мен Қазақстанның имиджін жоғары деңгейде көрсетуге қосқан үлес болмақ.