Орал қаласындағы №2 БЖСМ директорының оқу ісі жөніндегі орынбасары Гүлбану Баекесованың хабарлағанындай, аталмыш бәсекеге 13 облыс пен Алматы және Астана қалаларынан таңдаулы 100 спортшы қатысқан. Қатысушылардың бесеуі халықаралық дәрежедегі спорт шебері болса, 19-ы — ҚР спорт шебері, әлем және Азия чемпиондары. Бұл сайыс жақында Чехияда өтетін әлем чемпионатына үміткерлерді іріктеу мақсатында өткізілді.
Еліміздің ең мықты тоғызқұмалақшылары қатысқан сайыс тартысты өтті. Бірнеше күнге созылған бұл бәсеке нағыз шебер ойыншыны анықтап берді. Осы жарыста 4 халықаралық дәрежедегі спорт шеберімен және 4 спорт шеберімен ойнап, бақ таластырған №2 БЖСМ-ның тәрбиеленушісі Сайлан Матылов өзінің мықты спортшы екендігін дәлелдеп берді. Сөйтіп ол үздік тоғызқұмалақшы ретінде 13 шілдеде Чехияда өтетін әлем чемпионатына жолдаманы ұтып алды. Бұған дейін де облыстық және республикалық жарыстардан жүлделі орындарды иеленіп жүрген дарынды спортшының бұл бәсекеден де табыспен оралатынына сенім мол.
