Бұл туралы Caravan.kz медиа порталы tengrinews.kz-ке сілтеме жасап хабарлайды.
Елдер немен айналысады?
Ішкі істер министрінің орынбасары Санжар Әділовтің мәлімдеуінше, келісім Қазақстан мен Қатардың құқық қорғау органдарына өзара іс-қимыл жасауға құқық береді.
Тараптар ақпарат алмасып, мына қылмыс түрлеріне қарсы бірлесе әрекет етеді:
- ұйымдасқан қылмыс;
- терроризм;
- есірткінің заңсыз айналымы;
- киберқылмыс;
- заңсыз көші-қон;
- адам саудасы.
Келісімге екі елдің ішкі істер министрлері 2024 жылғы 29 қазанда Доха қаласында қол қойған болатын.
«Сондай-ақ ынтымақтастық барысында біз ақпарат алмасып, өз тәжірибемізбен бөлісе аламыз», – деді Әділов.
Қандай тыйымдар болады?
Әділовтің түсіндіруінше, егер сұранысты орындау ұлттық қауіпсіздікке немесе қоғамдық тәртіпке нұқсан келтіреді деп есептелсе немесе ел заңнамасына қайшы келсе, тараптар оны орындаудан бас тарта алады.
Мұндай шектеулер басқа да халықаралық келісімдерде қарастырылған.
«Бұл келісімді ратификациялау Қатармен тиімді жұмыс орнатуға және барлық халықаралық нормаларды ескере отырып, өзара іс-қимылды қамтамасыз етуге мүмкіндік береді», – деп атап өтті спикер.
Қазіргі уақытта Қазақстанның 20-дан астам елмен, соның ішінде Франция, Италия, Қытай, Түркия және БӘӘ-мен осындай келісімдері бар.
Ұқсас келісім қазірдің өзінде жұмыс істеп тұр
Отырыс барысында депутаттардың бірі бұл келісім Интерпол арқылы жүзеге асып жатқан қолданыстағы ынтымақтастық тетіктерін қайталамай ма деп сұрады.
Санжар Әділов келісімнің басқа шарттарды қайталамайтынын айтты. Оның сөзінше, олар құқықтық көмек мәселелерін, соның ішінде қылмыстық істер бойынша сотталғандарды ұстап беру мен тапсыруды реттейді. Толығырақ осы жерден оқи аласыз.
Жаңа келісім нақты құқық қорғау органдарының жедел өзара іс-қимылына қатысты.
Қазақстан Қатарға нота жолдайды
Депутат Константин Авершин Қазақстан тарапынан келісімді бірден алты ведомство: ІІМ, ҰҚК, Сыбайлас жемқорлыққа қарсы қызмет, Бас прокуратура, Қаржылық мониторинг агенттігі және Мемлекеттік күзет қызметі орындайтынына назар аударды. Ал Қатар тарапынан тек бір ғана ведомство – ІІМ көрсетілген.
Депутат бұл жағдай іс жүзінде қиындық тудырмай ма деп сұрады. Мәселен, егер Қазақстанның екі ведомствосы бір іс бойынша Қатарға бір уақытта сұраныс жолдаса не болады?
Әділов ратификациядан кейін Қазақстан Қатарға арнайы нота жіберетінін айтты. Онда алты ведомствоның әрқайсысы қандай мәселелерге жауапты екені егжей-тегжейлі көрсетіледі. Оның айтуынша, әртүрлі органдардың бір мезгілде бір істі тергеуі іс жүзінде мүмкін емес.