Қазақстан спорт мектептерінен түлеп шыққан балуандардың арасынан ең алғашқы болып Александр Иванов (Монреаль, 1976 ж.) олимпиада бозкілемінен медаль асынып қайтты. Бұл баянды бастама тек 20 жылдан кейін ғана өз жалғасын тапты. 1996 жылы Атлантада өткен олимпиадада Мәулен Мамыров жартылай финалда болшақ чемпионға жол беріп, қола жүлдемен оралды.
Келесі жүлдегеріміз Ислам Байрамуков болды. Ол Сидней олимпиадасында Ресейлік Сагид Муртазалиевтен ғана жеңіліп, жеңіс тұғырының екінші сатысына табан тіреген болатын. Одан кейінгі Афины мен Бейжің олимпиадаларынан Геннадий Лалиев, Таймураз Тигиев және Марид Муталимов сынды еркін күрес шеберлері жүлдемен оралды.
