ҚазАқпарат - Кеше, 17 шілдеде футболдан Қазақстанның 19 жасқа дейінгі (U-19) жасөспірімдер құрамасының аға бапкері болып Михаил Соловьев тағайындалды, деп хабарлайды Қазақстан футбол федерациясының баспасөз қызметі. 43 жастағы ресейлік маман серб бапкері Небойша Миличичті алмастырып отыр. Миличич команданың қанағаттанарлықсыз нәтижелері үшін қызметінен кеткен болатын.
Михаил Соловьев, футболшы ретінде көп жылдар ЦСКА (Мәскеу) және «Торпедо» (Мәскеу) клубтарында ойнады. Бапкерлік қызметті «Мәскеу» футбол клубынан бастады. Кейін футболдан РФ-ның 17 жасқа дейінгі (U-17) жасөспірімдер құрамасының аға бапкері болды. UEFA ұйымының А санатты бапкер лицензиясына ие.
